أنا من أنصار الفصحى في كل تدويناتي فهي اللغة الأم التي طالما تمسكت بها في كل كتاباتي ولكني اليوم سأكسر القاعدة ، وأتنازل عن قناعاتي لأنه بصراحة بلغ السيل الزبى !!
هلأ احترنا والله حيرنا مع هيك اتحاد رياضي ، وخاصة بعد رجعة فاروق بوظو للواجهة، ورجعنا لعقلية "تبويس الدقون" وزيتها بتمشي " والحلول الوسط ، والبدائل الأخرى (بضم الألف ما حدا يفهم غلط).
يا جماعة نزل حطين والفتوة لأ النواعير وجبلة ولا قلكن لا حرام جبلة راشي اذا لا بد يكون فيه مرتشي لحتى تكتمل المعادلة بلا ما ننزله .
طب بهالحالة بيزعل حطين والفتوة بعد ما اتحاد الجبان طلع القرارات الجريئة .. وعشمنا اللادقية والدير ..
كل شي اله مخرج .. بنقيل الجبان واتحاده حتى ما يتراجع وبنشكل لجنة تسيير لأمور كرة القدم (تقول حنطور ما علينا..) وهي اللي بتتراجع وهيك يا دار ما دخلك شر .
بصراحة وبدون زعل العميد فاروق بوظو عطى كل اللي عنده وما شفنا منه تقدم للكرة السورية كل مالها لورا من يوم اللي شمر عن سواعده يا جماعة والله فيه كفاءات مغمورة ونضيفة الكف وعقليات تطويرية غير شكل بس ..
المهم طلعلنا سيادة العميد بعد ما قعد ساعتين يفكر وهو عم يدوش بقرارات ما بتزعل حدا بدو الكل رضيان قال شو : بنعمل دورة رباعية والأول والتاني بمر والتالت والرابع بهر ..
لأ وشو باللعيبة المسجلين بالفرق الأربعة السنة الماضية واللي اغلبن صاروا بفرق تانية بدن يلموهن من جديد لأ والمباريات بداية الأسبوع يا عمي سلق بطاطا الشغلة .
يعني بصراحة شي بيتعب الكبد كرتنا صارت بايد اولااااااااااد أيه اولااااااااااد ، لأ والاتحاد الآسيوي عم يهدد بتجميد نشاطات كرة القدم السورية برة يعني كملت برة وجوا .
وبالآخر بتعرفوا ع شو بدها ترسي بدن يقولوا خلص الدوري الجاية ب 16 فريق بدل 14 لعيون الحبايب ، وبكرة بتشوفوا ، أما تطور بالكرة السورية انسوا وخدوا وعود وعالوعد يا كمون ، طول ما هالوجوه القديمة الجديدة عم تتحفنا بابداعات غير شكل .
يرحم أهلك يا ((أيمن زيدان )) وانت عايش قلتها : عوجا وياما حنشوف !!
إرسال تعليق